ਅੱਜਕੱਲ੍ਹ ਤੰਬਾਕੂ, ਗੁਟਖਾ, ਪਾਨ ਮਸਾਲਾ ਅਤੇ ਸਿਗਰਟ ਵਰਗੀਆਂ ਆਦਤਾਂ ਕਾਰਨ ਲੋਕਾਂ ਦੀ ਮੂੰਹ ਦੀ ਸਿਹਤ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋ ਰਹੀ ਹੈ। ਸਭ ਤੋਂ ਪਹਿਲਾਂ ਇਸਦਾ ਅਸਰ ਦੰਦਾਂ ’ਤੇ ਪੈਂਦਾ ਹੈ। ਦੰਦਾਂ ਦਾ ਕੁਦਰਤੀ ਚਿੱਟਾਪਣ ਘਟ ਜਾਂਦਾ ਹੈ ਅਤੇ ਉਹ ਲਾਲ, ਪੀਲੇ ਜਾਂ ਭੂਰੇ ਰੰਗ ਦੇ ਦਿਸਣ ਲੱਗ ਪੈਂਦੇ ਹਨ। ਇਹ ਸਿਰਫ਼ ਸੁੰਦਰਤਾ ਦੀ ਸਮੱਸਿਆ ਨਹੀਂ, ਸਗੋਂ ਮੂੰਹ ਦੀ ਗੰਭੀਰ ਬਿਮਾਰੀਆਂ ਵੱਲ ਵੀ ਇਸ਼ਾਰਾ ਕਰਦਾ ਹੈ।
ਤੰਬਾਕੂ ਅਤੇ ਗੁਟਖਾ ਵਿੱਚ ਮੌਜੂਦ ਰਸਾਇਣਕ ਤੱਤ ਦੰਦਾਂ ’ਤੇ ਜਮੀ ਹੋਈ ਪਰਤ (ਪਲੇਕ) ਨੂੰ ਮਜ਼ਬੂਤ ਕਰ ਦਿੰਦੇ ਹਨ, ਜਿਸ ਨਾਲ ਦੰਦਾਂ ਦੀ ਚਮਕ ਖਤਮ ਹੋ ਜਾਂਦੀ ਹੈ। ਲੰਮੇ ਸਮੇਂ ਤੱਕ ਇਹ ਆਦਤਾਂ ਜਾਰੀ ਰਹਿਣ ਨਾਲ ਮਸੂੜਿਆਂ ਦੀ ਸੋਜ, ਦੰਦਾਂ ਦੀ ਸੜਨ ਅਤੇ ਮੂੰਹ ਦੇ ਕੈਂਸਰ ਦਾ ਖ਼ਤਰਾ ਵੀ ਵਧ ਜਾਂਦਾ ਹੈ। ਹਾਲਾਂਕਿ, ਕੁਝ ਆਸਾਨ ਘਰੇਲੂ ਉਪਾਅ ਅਪਣਾ ਕੇ ਦੰਦਾਂ ਦੀ ਖ਼ਰਾਬ ਹੋ ਰਹੀ ਰੰਗਤ ਨੂੰ ਕਾਫ਼ੀ ਹੱਦ ਤੱਕ ਠੀਕ ਕੀਤਾ ਜਾ ਸਕਦਾ ਹੈ।
ਸਭ ਤੋਂ ਪਹਿਲਾਂ ਨਮਕ ਅਤੇ ਨਿੰਬੂ ਦਾ ਉਪਾਅ ਕਾਫ਼ੀ ਲਾਭਦਾਇਕ ਮੰਨਿਆ ਜਾਂਦਾ ਹੈ। ਥੋੜ੍ਹਾ ਜਿਹਾ ਨਮਕ ਨਿੰਬੂ ਦੇ ਰਸ ਵਿੱਚ ਮਿਲਾ ਕੇ ਹਫ਼ਤੇ ਵਿੱਚ ਦੋ ਵਾਰ ਦੰਦਾਂ ’ਤੇ ਹੌਲੀ-ਹੌਲੀ ਮਲਣ ਨਾਲ ਦੰਦਾਂ ਦੀ ਪੀਲੀ ਪਰਤ ਹਟਣ ਲੱਗਦੀ ਹੈ। ਇਸੇ ਤਰ੍ਹਾਂ ਬੇਕਿੰਗ ਸੋਡਾ ਵੀ ਦੰਦ ਸਾਫ਼ ਕਰਨ ਵਿੱਚ ਮਦਦਗਾਰ ਹੈ। ਬੇਕਿੰਗ ਸੋਡਾ ਨੂੰ ਪਾਣੀ ਨਾਲ ਮਿਲਾ ਕੇ ਹਫ਼ਤੇ ਵਿੱਚ ਇੱਕ ਵਾਰ ਵਰਤਣਾ ਚਾਹੀਦਾ ਹੈ।
ਨੀਂਮ ਦੀ ਦਾਤਣ ਜਾਂ ਨੀਂਮ ਦੇ ਪੱਤਿਆਂ ਨਾਲ ਬਣਿਆ ਮੰਜਨ ਦੰਦਾਂ ਲਈ ਬਹੁਤ ਫ਼ਾਇਦੇਮੰਦ ਹੈ। ਇਹ ਦੰਦਾਂ ਨੂੰ ਸਾਫ਼ ਕਰਨ ਦੇ ਨਾਲ-ਨਾਲ ਮਸੂੜਿਆਂ ਨੂੰ ਵੀ ਮਜ਼ਬੂਤ ਬਣਾਉਂਦਾ ਹੈ। ਨਾਰੀਅਲ ਤੇਲ ਨਾਲ ਤੇਲ ਖਿੱਚਣਾ (ਆਇਲ ਪੁਲਿੰਗ) ਵੀ ਇੱਕ ਪੁਰਾਣਾ ਤੇ ਪ੍ਰਭਾਵਸ਼ਾਲੀ ਤਰੀਕਾ ਹੈ, ਜਿਸ ਨਾਲ ਦੰਦਾਂ ਦੀ ਗੰਦਗੀ ਦੂਰ ਹੁੰਦੀ ਹੈ ਅਤੇ ਚਮਕ ਵਾਪਸ ਆਉਂਦੀ ਹੈ।
ਮਾਹਰਾਂ ਦਾ ਕਹਿਣਾ ਹੈ ਕਿ ਇਨ੍ਹਾਂ ਉਪਾਅਾਂ ਦੇ ਨਾਲ-ਨਾਲ ਤੰਬਾਕੂ ਅਤੇ ਗੁਟਖਾ ਵਰਗੀਆਂ ਨਸ਼ੀਲੀਆਂ ਆਦਤਾਂ ਨੂੰ ਛੱਡਣਾ ਬਹੁਤ ਜ਼ਰੂਰੀ ਹੈ। ਸਹੀ ਦੰਦ ਸਫ਼ਾਈ, ਸੰਤੁਲਿਤ ਆਹਾਰ ਅਤੇ ਨਿਯਮਿਤ ਦੰਤ ਚਿਕਿਤਸਕ ਦੀ ਸਲਾਹ ਨਾਲ ਦੰਦ ਮੁੜ ਮੋਤੀਆਂ ਵਾਂਗ ਚਮਕ ਸਕਦੇ ਹਨ।